【受難日】
話說屋企嘅軍糧清得七七八八，我哋預計仲有唔夠兩星期就乾塘，之前姑拉試過上網買餸，可能係小鎮嘅關係，買餸網嘅選擇好有限，呢樣又冇嗰樣又唔夠新鮮，睇嚟靠吃的真係唔可以假手於人。
自從肺炎爆發，經過我嘅洗腦式教育後，意佬比一般意大利人嘅防疫意識要強。所謂「鼻大招風」，可惜呢位人兄戴親口罩都成日流鼻水，我哋研究過，揸車去超市買餸連埋排隊足足三個鐘，而每次買餸每戶只能派一個代表否則罰錢400歐！摸過哂超市嘅嘢又要唔呻鼻涕實在冇可能，唯有啟動Plan B : 我去買！
問題來了，我架自動波車泊咗喺奶奶嘅車房，依家攞唔到，得返意佬一直唔捨得賣02年已停產嘅老爺四驅車。自從n年前考咗棍波車牌後都未揸過棍波車，依家為咗家人嘅人生安全，我決定重新接受挑戰💪學！棍！波！
雖然只係喺屋企樓下停車場將架車向前又向後咁，但我嘅尖叫聲同嗌救命聲已轟炸全個住宅區！坐我隔離嗰個...應該好快失聰😅
琴日係耶穌受難日，喺我屋企，似乎係老公受難日多啲🙈辛苦你喇~你老婆能否順利衝破難關揸返棍波車，屋企食粥定食草皮靠你喇🤣
#受難日
#肺炎好危險
#女人揸車條馬路仲危險
#意大利抗疫日常
#新聞終於宣布叫人戴口罩
#有時有啲嘢真係要迫出嚟
Search